Nyob rau Lub Peb Hlis Ntuj Tim 1, 2025, Tus Tuam Thawj Teb Chaws Trump tau tawm Tsab Lus Txib Los Ntawm Feem Tswj Hwm 14224 uas tshaj tawm tias kom siv Lus Askiv los ua hom lus siv raws cai ntawm Teb Chaws Meskas thiab thim Tsab Lus Txib Los Ntawm Feem Tswj Hwm 13166, hais txog Kev Txhim Kho Kev Nkag Mus Siv Cov Kev Pab Cuam rau Cov Neeg Paub Lus Askiv Tsawg, uas tsim tawm los ntawm Tus Tuam Thawj Teb Chaws Clinton hauv xyoo 2000.
Cov cai hais txog hom lus hais yog yeej cog tob rau hauv tsoom hwv teb chaws thiab lub lav cov cai, uas yog qhov tseem ceeb heev rau kev hwj xwm peb txoj kev noj qab haus huv, kev nyab xeeb, thiab kev noj qab nyob zoo ntawm ib tug neeg thiab txhua leej, ua ke nrog kev xyuas kom paub tseeb tias tag nrho cov zej zog, tas yuav yog peb siv hom lus twg los xij, yeej koom tau thiab muaj feem pab rau kev huaj vam ntawm zej tsoom. Txawm tias tsoom hwv teb chaws thiab lub lav cov kev cai lij choj uas twb yeej muaj nyob lawm tseem tsis tau muab hloov pauv los ntawm Trump tsab lus txib los ntawm feem tswj hwm los xij, tsab lus txib yeej tawm tsam rau kev huaj vam mus tom ntej ntawm kev nkag cuag tau rau hom lus rau txhua leej yam muaj txiaj ntsig zoo los tau nees nkaum lub xyoo no lawm.
The Asian Law Caucus, California Rural Legal Assistance, Inc. (CRLA), thiab Legal Aid Foundation of Los Angeles (LAFLA) tau tsim daim ntawv Lus Nug Uas Nquag Nug (FAQ) no los pab cov pab pawg hauv zej zog thiab cov neeg ua hauj lwm hauv lub lav thiab hauv zej zog nkag siab txog ciaj ciam thiab kev cuam tshuam ntawm Tsab Lus Txib Los Ntawm Feem Tswj Hwm 14224 Ntawm Trump. Peb yuav hloov kho tshiab phab no txuas mus ntxiv thaum uas peb tsom xam seb tsoom hwv cov chaw hauj lwm hais li cas txog tsab lus txib no tso.
Daim FAQ no muab lus taw qhia nthuav dav nkaus xwb thiab yuav tsis tau txhais tias yog lus pab tswv yim fab kev cai lij choj. Qhov ntaub ntawv qhia paub hauv daim ntawv no yuav hloov pauv tas li. Yog tias koj lub koom haum xav tau kev pab fab kev cai lij choj, los sis yog koj muaj lus nug ntxiv hais txog cov ncauj lus sib tham no, thov tiv tauj:
- Asian Law Caucus ntawm 415-896-1701 los sis asianlawcaucus.org/contact
- California Rural Legal Assistance, Inc. ntawm 1-800-337-0690 los sis crla.org/locations
- Legal Aid Foundation of Los Angeles ntawm 1-800-399-4529, lafla.org/get-help/
COV LUS NUG UAS NQUAG NUG
Tsab Lus Txib Los Ntawm Feem Tswj Hwm 14224 hais txog kev muab Lus Askiv los siv ua hom lus raws cai ntawm Teb Chaws Meskas yog siv ua dab tsi?
Tsab lus txib no tshaj tawm tias yuav muab Lus Askiv los ua hom lus raws cai ntawm Teb Chaws Meskas. Tsab lus txib kuj tseem thim Tsab Lus Txib Los Ntawm Feem Tswj Hwm 13166, uas yog tsab lus txib los ntawm feem tswj hwm uas kos npe los ntawm Tus Tuam Thawj Teb Chaws Clinton hauv xyoo 2000.
Clinton Tsab Lus Txib Los Ntawm Feem Tswj Hwm 13166 tseev kom tsoom hwv cov chaw hauj lwm los tsim thiab siv cov phiaj xwm los pab rau cov neeg uas paub Lus Askiv tsawg kom nkag mus siv tau cov khoos kas kev pab thiab cov dej num uas tsoom hwv teb chaws saib xyuas. Clinton tsab lus txib kuj tseev kom tsoom hwv teb chaws cov chaw hauj lwm los tsim tawm lus taw qhia txog kev nkag cuag tau rau hom lus rau cov koom haum uas tau txais nyiaj pab ntawm tsoom hwv teb chaws, los xyuas kom paub tseeb tias muaj kev nkag cuag tau rau txhua leej yam muaj txiaj ntsig zoo.
Trump Tsab Lus Txib Los Ntawm Feem Tswj Hwm 14224 tseev kom Tus Thawj Kws Lij Choj los thim cov ntaub ntawv lus taw qhia txog txoj cai uas tsim tawm los hauv EO 13166 thiab muab “lus taw qhia uas hloov kho tshiab,” tab sis tsis tas kom tsoom hwv teb chaws cov chaw hauj lwm los sis cov koom haum uas tau txais nyiaj pab los ntawm tsoom hwv teb chaws los tsum kev txhawb nqa pab hom lus uas twb muaj nyob lawm uas lawv yuav muab rau cov neeg uas siv cov lus uas tsis yog Lus Askiv. Tsab lus txib los ntawm feem tswj hwm hais tias “tsis muaj dab tsi hauv tsab lus txib no … tseev kom los sis taw qhia kev hloov pauv twg hauv cov kev pab cuam uas muab los ntawm ib lub chaw hauj lwm twg” thiab cov chaw hauj lwm ntawd “tsis tas muaj kev hloov pauv, tshem tawm, los sis tsis li ntawd tsum kev tsim cov ntawv, cov khoom lag luam, los sis lwm cov kev pab cuam uas muab npaj tseg los sis tau muab ua hom lus uas tsis yog Lus Askiv.”
Li cas los xij, tseem yuav saib mus ntxiv seb tsoom hwv teb chaws cov chaw hauj lwm yuav siv kev txiav txim siab ntawm lawv tus kheej, xaiv los hloov los sis txo qis qhov kev pab cuam hom lus ntau npaum cas uas lawv muab rau cov neeg uas paub Lus Askiv tsawg, los sis tsim qhov lus qhia txog kev nkag cuag rau hom lus “uas hloov kho tshiab” uas ua rau muaj qhov sib txawv yam pom tau tseem ceeb los ntawm qhov lus taw qhia ua ntej no.
Qhov uas muab Lus Askiv los ua hom lus raws cai hauv Teb Chaws Meskas no muaj kev cuam tshuam li cas thiab?
Teb Chaws Meskas yog ib lub chaw nyob uas muaj cov tib neeg hais ntau tshaj 350 hom lus, uas muaj cov neeg hais coob tshaj 69 lab leej. Txhua hnub, cov tsev kawm ntawv, cov chaw kho mob, cov tsev hais plaub, thiab lwm cov chaw hauj lwm ntawm tsoom hwv nyob rau txhua theem muab cov chaw muab kev pab cuam thiab cov kev pab cuam ua ntau hom lus. Peb li kev noj qab haus huv, kev nyab xeeb, thiab kev noj qab nyob zoo rau ib tug neeg thiab txhua leej yuav nce raws li kev xyuas kom paub tseeb tias muaj kev sib txuas lus tau zoo heev thiab muaj txiaj ntsig zoo thiab kev nkag cuag tau rau hom lus rau txhua leej ntawm peb cov zej zog.
Txawm tias yuav muaj Trump Tsab Lus Txib Los Ntawm Feem Tswj Hwm 14224 los xij, thiab txawm tias tsis muaj Tsab Lus Txib Los Ntawm Feem Tswj Hwm 13166 lawm los xij, txoj cai lij choj yeej tseem tseev kom muaj kev pab rau kev siv lus. Cov lus txib los ntawm feem tswj hwm tsis tuaj yeem tshem tau cov cai lij choj los sis cov cai tswj hwm uas twb muaj nyob lawm.
Tsis tas li ntawd, txhua tus neeg hauv Teb Chaws Meskas – txawm tias yuav nyob qhov twg tuaj los xij, lawv qhov kev paub Lus Askiv zoo, los sis lawv qhov txheej xwm kev nkag teb chaws – yeej tau kev pov thaiv tawm tsam rau kev ntxub ntxaug raws li teb chaws yug, suav nrog hom lus. Tsoom hwv teb chaws thiab lub lav cov cai lij choj kuj tseem yuav xav tau kev txhais lus piav tes txuas mus ntxiv rau cov neeg Lag Ntseg thiab Tsis Hnov Lus Zoo.
Peb tsim nyog soj ntsuam xyuas thiab yuam siv peb cov cai raws li cov kev cai lij choj thiab cov cai tswj hwm kev nkag cuag hom lus no yam tsis tu ncua, raws li qhov tsim nyog.
Qee yam piv txwv txog cov cai lij choj thiab cov cai tswj hwm uas tseev kom yuav tsum muaj kev pab fab lus hais, txawm tias yuav muaj Tsab Lus Txib Los Ntawm Feem Tswj Hwm tshiab no lawm los xij yog muaj cov twg?
Nqe VI ntawm Tsab Cai Hais Txog Pej Xeem Cov Cai xyoo 1964 txwv cov neeg tau txais nyiaj pab ntawm tsoom hwv teb chaws tsis pub muaj kev ntxub ntxaug raws li “teb chaws yug,” uas Lub Tsev Hais Plaub Qib Siab Tshaj Plaws tau txhais ntsiab lus tias suav nrog kev ntxub ntxaug uas saib raws li hom lus thiab. Nqe VI cov cai tswj hwm kuj hais txog cov xwm txheej uas yuav tsum tau muaj cov kev pab cuam txhais lus.
Tshooj Cai 504 ntawm Tsab Cai Kev Kho Kom Zoo Rov Los Xyoo 1973 thiab Tsab Cai Hais Txog Neeg Mes Kas Xiam Oob Qhab (ADA) xav tau cov kev pab cuam txhais lus piav tes rau cov neeg Lag Ntseg thiab Tsis Hnov Lus Zoo, ntxiv rau lwm yam kev pab cuam.
Lwm cov lus txib ntawm tsoom hwv teb chaws uas tseev kom muaj kev nkag cuag hom lus hauv qee cov ntsiab lus suav nrog, tab sis tsis tas rau:
- Tsab Cai Hais Txog Tswj Hwm Kev Ua Txhaum Cai thiab Kev Tsheb Nyab Xeeb xyoo 1968 (tub ceev xwm, cov tsev hais plaub)
- Tshooj Cai 1557 ntawm Tsab Cai Hais Txog Kev Saib Xyuas Kho Mob Tsis Kim Heev (cov tsev kho mob, cov chaw kuaj mob, cov chaw muab kev tuav pov hwm kev noj qab haus huv, Medicaid cov chaw hauj lwm hauv lub lav, cov chaw pab cuam kekv noj qab haus huv hauv lub lav, kws kho mob cov kev coj ua thiab cov chaw hauj lwm saib xyuas kho mob hauv tsev; saib ntxiv rau ntawm no)
- Tsab Cai Hais Txog Daim Ntawv Nqa Khoom Noj (cov chaw hauj lwm hauv lub lav thiab hauv zej zog uas saib xyuas SNAP cov txiaj ntsig kev pab)
- Tsab Cai Hais Txog Tswv Yim Tshiab Ntawm Neeg Ua Hauj Lwm thiab Hwv Tsam (cov chaw hauj lwm hauv lub lav thiab hauv zej zog uas saib xyuas cov txiaj ntsig uas ntsig txog kev ua hauj lwm)
- Tshooj Cai 203 ntawm Tsab Cai Hais Txog Kev Muaj Cai Pov Npav Xaiv Tsa (cov ntaub ntawv kev xaiv tsa)
- Tsab Cai Hais Txog Kev Muaj Chaw Nyob Yam Ncaj Ncees (cov chaw hauj lwm hauv lub lav thiab hauv zej zog xyuas kom paub tseeb tias muaj tsev nyob yam ncaj ncees)
- Tsab Cai Hais Txog Cov Hwm Tsam Kev Kawm Sib Npaug Zog (1974) (cov tsev kawm ntawv/cov ntsiab lus fab kev kawm; saib ntxiv rau ntawm no)
- Tsab Cai Stafford (FEMA qhov kev daws txo kev puas tsuaj; saib ntau ntxiv ntawm no)
Lub lav cov cai lij choj tsis pub muaj kev ntxub ntxaug thiab cov cai kev nkag cuag tau rau hom lus yuav siv tau rau cov koom haum hauv zej zog thiab hauv lav, suav nrog qee cov chaw muab kev pab cuam.
Ntau kaum lub xyoo dhau los, cov chaw hauj lwm ntawm tsoom hwv teb chaws kuj tau tsim cov phiaj xwm kev nkag cuag tau rau hom lus thiab cov cai uas muaj lub hauv paus los ntawm tsoom hwv teb chaws txoj cai lij choj thiab kev pov thaiv raws tsab niam cai uas tseem siv tau.
Tsab lus txib ntawm Trump cuam tshuam rau cov neeg tau txais tsoom hwv cov nyiaj pab li cas, xws li cov tsev hais plaub hauv zej zog, cov tsev kawm ntawv, thiab cov tsev kho mob?
Cov neeg tau txais tsoom hwv teb chaws qhov nyiaj pab tuaj yeem muaj, piv txwv li, cov lav thiab cov nroog loj, lub lav cov tsev hais plaub, cov tsev kho mob thiab kws kho mob cov chaw hauj lwm, cov chaw hauj lwm hauv lub lav thiab hauv zej zog uas saib xyuas cov txiaj ntsig kev pab rau pej xeem, thiab cov tsev kawm ntawv nom tswv pab. Cov neeg tau txais nyiaj pab ntawm tsoom hwv teb chaws txhua leej yuav tsum tau ua raws li txoj cai lij choj uas twb muaj lawm txuas ntxiv mus thiab muab kev nkag cuag tau rau hom lus. Raws li muab sau tseg saum toj no, muaj ntau txoj cai lij choj thiab cov cai tswj hwm uas yuam kom muaj kev nkag cuag tau rau hom lus txuas ntxiv mus, suav nrog ntawv txhais, kev txhais ntawm qhov ncauj thiab kev txhais lus piav tes, thiab cov ntawv ceeb toom uas taw qhia rau cov tswv cuab hauv zej zog txog txoj hau kev yuav nkag cuag tau rau kev txhawb nqa hom lus. Cov lus txib los ntawm feem tswj hwm yeej tsis tuaj yeem tso tseg los sis hloov pauv cov kev cai lij choj uas twb muaj nyob lawm tau li.
Thaum uas peb soj ntsuam xyuas seb cov chaw hauj lwm ntawm tsoom hwv teb chaws yuav teb li cas txog qhov kev hloov pauv no, cov tsoom hwv hauv zej zog thiab hauv lub lav thiab cov koom haum uas tau txais nyiaj pab ntawm tsoom hwv teb caws – suav nrog cheeb tsam tsev kawm ntawv thiab cov tsev kho mob – tuaj yeem muab kev pab cuam tam li yog lub chaw muab kev ruaj ntseg thiab kev nyab xeeb rau pej xeem los ntawm kev qhia meej txog lawv txoj kev cog lus yuav muab kev pab cuam ntau hom lus yam tsis tu ncua. Qee cov neeg tau txais nyiaj pab ntawm tsoom hwv, xws li Lav Hawai’i Lub Chaw Hauj Lwm Kws Lij Choj, tau rov qhia meej txog lawv li kev cog lus rau kev xyuas kom paub tseeb tias muaj kev nkag cuag tau rau hom lus uas muaj txiaj ntsig zoo lawm.
Cov pej xeem puas tseemm tuaj yeem thov neeg txhais lus los sis cov ntawv sau ua lawv hom lus xub thawj los ntawm tsoom hwv cov chaw hauj lwm thiab cov koom haum uas tau txais nyiaj pab ntawm tsoom hwv teb chaws thiab?
Tau! Feem ntau lawm, txhua leej tseem muaj cai raws kev cai yuav tau kev pab txhais lus los ntawm cov khoos kas kev pab thiab cov kev pab cuam uas tau txais tsoom hwv teb chaws li kev pab nyiaj. Qhov no tuaj yeem suav nrog kev sib txuas lus nrog cov tswv cuab neeg ua hauj lwm uas hais tau lawv hom lus, ua hauj lwm nrog cov neeg txhais lus uas tsim nyog, thiab/los sis tau txais cov ntaub ntawv uas muab txhais lus. Cov chaw muab kev pab cuam xws li I Speak Cards kuj tuaj yeem pab cov tswv cuab hauv zej zog txheeb xyuas txog lawv hom lus xub thawj thiab thov cov kev pab cuam txhais lus tau.
Tus neeg tsim nyog ua dab tsi yog tias lawv raug tsis kam muab kev nkag cuag tau rau hom lus los ntawm tsoom hwv lub chaw hauj lwm los sis lub koom haum uas tau txais tsoom hwv teb chaws li kev pab nyiaj?
Yog tus neeg uas xav nkag cuag cov kev pab cuam uas muab los ntawm tsoom hwv lub chaw hauj lwm los sis lub koom haum uas tau txais tsoom hwv teb chaws li kev pab nyiaj thiab raug tsis pom zoo muab neeg txhais lus los sis cov ntaub ntawv uas muab txhais ua lawv hom lus xub thawj, lawv tsim nyog nrhiav kev pab los ntawm lub chaw muab kev pab cuam fab kev cai lij choj.
